Ազգային ժողովի լիազորությունների ժամկետի ավարտման օրից 4 ամիս առաջ նշանակվում են հերթական ընտրություններ: 

Ընտրություններն անցկացվում են ոչ ուշ քան Ազգային Ժողովի լիազորությունների ավարտման օրը: 

Հեթական ընտրությունները նախապատրաստվում եւ անց են կացվում սույն օրենքով սահմանված կարգով: 

Հոդված 46. Ընտրական հանձնաժողովների կազմման ժամկետները 

Կենտրոնական ընտրական հանձնաժողովը կազմվում է հերթական ընտրությունների օրվանից առնվազն 80 օր առաջ: 

Հերթական ընտրությունների օրվանից առնվազն 60 օր առաջ կազմվում են ընտրատարածքային ընտրական հանձնաժողովները: 

Հերթական ընտրությունների օրվանից առնվազն 30 օր առաջ կազմվում են տեղամասային ընտրական հանձնաժողովները: 

Հոդված 47. Ընտրատարածքների եւ ընտրական տեղամասերի ձեւավորման ժամկետները 

Հայաստանի Հանրապետության տարածքի բաժանումը ընտրատարածքների իրականացվում է ընտրությունների օրվանից առնվազն 70 օր առաջ: 

Ընտրատարածքի բաժանումը ընտրական տեղամասերի  իրականացվում է ընտրությունների օրվանից առնվազն 40 օր առաջ: 

Հոդված 48. Պատգամավորության թեկնածուների առաջադրման եւ գրանցման ժամկետները 

Պատգամավորության թեկնածուների առաջադրումը սկսվում է ընտրությունների օրվանից ոչ շուտ, քան 60 օր առաջ եւ ավարտվում է ընտրությունների օրվանից 40 օր առաջ՝ ժամը 18.00-ին: 

Համամասնական ընտրություններին մասնակցելու համար հասարակական-քաղաքական կազմակերպությունների կամ նրանց միավորումների կողմից հայտ ներկայացվում է ընտրությունների օրվանից առնվազն 75 օր առաջ: 

Պատգամավորության թեկնածուների գրանցումն ավարտվում է ընտրությունների օրվանից 25 օր առաջ: 

Նախընտրական ծրագրերը համապատասխան ընտրական հանձնաժողով կարող են ներկայացվել ընտրությունների օրվանից 20 օր առաջ: